情場失意, 賭場亦失意

今天跟業sir牌局時得知他跟拍了半年拖的A君正在冷戰中.

事情是這樣的: 話說業sir素來都有不少仰慕者, 一來樣子不太差, 二來有才華, 三來聲線比陳志雲好N倍. 仰慕者甲一直都對業sir有意思, 可惜神女有心, 襄王無夢, 所以從來都沒有甚麼發生. 最近仰慕者甲生日, 加上甲準備了半年給業sir的生日禮物還未有機會送出, 所以約了出來食飯見面. 業sir已經事前跟A君報了案.

晚飯後的第二天, 業sir上了A君的屋企, 亦帶了仰慕者甲給他的禮物 - 是一隻關於member的三級片(業sir強調不是四仔). A君看到後便說了一句"你會唔會諗下我會唔開心?" 正當業sir還在咀嚼呢句說話之際, A君再來: "我點知你會唔會同佢睇完隻碟然後做乜野" 業sir頓時無名火起, 但依然抑制著怒氣, 說了一句"只是一頓晚飯一份禮物沒有甚麼大不了". 接著整晚都沒有再談話.

第二天, 業sir離開了A君屋企, 接著的一星期佢地再沒有任何聯絡. 業sir覺得自己沒有做錯所以企硬, 亦都發覺跟A君之間的溝通有很大的問題. 事實上, A君這些乾醋有點無聊, 難聽的說話又實在過份, 如果只是為了這件我認為微不足道的小事而鬧至分手收場就真是莫名奇妙. 業sir上msn見到A君online, 但A君的照片已由雙人照迅速改回單人照, 不知是不是有所暗示.

問到業sir如果繼續唔溝通是否就是無疾而終的分手, 佢話佢可能會打俾佢跟他溝通看看可不可以繼續一齊. 看得出業sir亦想繼續, 畢竟他都說"自己一個其實都幾悶", 但坦白說如果跟一個無法好好溝通的人一齊, 還可以捱多幾耐? 值唔值得?

以業sir的條件其實找個好點都不難, 為何要犯賤?

可能情場失意的關係影響心情, 業sir只是打了16圈就說累了, 我地亦都唔勉強佢, 最後他一人獨輸$400, 已經算好彩, 唯有希望他的感情生活盡快得到調整.

風神傷神

原來週末的太陽+悶熱是風神來臨的預告. 風神這個名字完全殺晒, 可惜來到香港之時已經減弱, 八號風球相對來說比較風平浪靜. 得來的半天假沒有半點興奮, 只是比平常睡多了一個小時, 九點便醒了, 聽到中午前會改掛三號, 心情亦沒有甚麼, 因為已經有了充份準備. 其實自己是可以在家裡工作, 反正女魔頭不在, 自己想點就點, 不過很多事始終在公司做比較方便, 所以一點左右便回到公司.

又要繼續做那個我想完全放棄的項目, 一日未達到目的, 這個項目就好像沒完沒了, 就是MD的一句說話, 就要動用我們多人的時間去做 - 坦白說過到九個月, 我相信最終這個項目都是失敗, 而我在呢段期間中所承受的壓力/批評更是非筆墨來形容. 明天又要為這個項目行動, 如果再沒有進展, 恐怕都是時候請辭了.

坦白說其實請辭亦沒有甚麼大不了, 反正這一年半的時間, 不開心的時間比開心的時間多N倍, 至今還未放棄都是為了啖氣, 但呢啖氣已經差不多用埋...冇氣跟女魔頭角力了, 真的很傷神.

曬傷救星

今日返公司所有人都問我同一個問題: "曬到咁紅既?" 秘書小姐還說我似賣印度神油的阿差. 經過某同事的推介去了屈臣氏買左一支專為曬傷而設的蘆薈啫喱. 塗上去涼浸浸, 唔會太"笠", 說可補充水份, 現在成塊面都好緊, 看來是時候換膚了. 雖然塗完有點像油光師傅, 但總比成塊面都是脫皮好看...

返到屋企看看上身都是重災區, 塗上胸前的敏感位置..嘩..好high呀~

支野都要$50, 但舒服要緊.

燒得厲害

剛剛的星期六日趁著很久沒有蒲頭的太陽終於出現, 急不及待要為自己雪白的皮膚上色. 地點一如以往都是中灣, 依舊的中灣, 依舊的member, alan依舊的幾乎裸曬 (自問勇氣還是欠了點). 雖然已經不斷為自己加(太陽)油, 但當天的太陽實在太厲害, 或者是因為太耐冇曬唔習慣, 後半時間已經開始面部有點灼痛...回到家裡照照鏡, 嘩, 變了燒豬, 唯有用一些治標不治本的方法如將毛巾放在冰箱敷面, 感覺是舒服一點, 但畢竟應該逃避不了甩皮的命運.

回家後, alan才發現我前面及背面曬得唔均勻, 結論就係星期日要去補曬. 佢要同屋企人去澳門, 所以唯有自己去. 邪門的事情就發生了 - 竟然俾我撞到alan個ex - T先生. 這位T先生在01年跟alan分手去了英國讀書, 我都只是從相片知道他是甚麼樣子. 早三個月前有一次在上環已經見過他, 當時跟alan說他都半信半疑, 其後從其他朋友口中得知他真的回來, 還住在上環, 返工亦跟alan一樣在中環, 幾邪! 講番在中灣見到T先生, 很奇怪, 兩次他都特意望一望我, 其實是互超, 莫非佢知我係邊個??

邪還邪, alan咁耐都未見番佢, 反而我就見左兩次, 莫非佢地真係緣份已盡?

給愛過我的女生們

自小頗有女人緣, 除了家父外, 其他都是女性. 小學因怕被其他男同學排斥所以較小跟女同學玩, 中學時卻跟女同學混得頗熟. 到了中四因為選擇了讀文科, 班裡45人, 女同學佔35人, 故此註定跟女同學玩...玩下玩下, 感情自然增長. 到了中六, 30人中女生有25人, 於是繼續做女人湯丸. 終於惹了J小姐的垂青.

當年J小姐趁一大班同學仔平安夜一齊去玩之時, 借意挽著我手臂, 嚇了我一跳, 然後扮冇事繼續行, 其他同學仔一看便知是甚麼回事. 當時我心裡只有讀書兩個字, 情是何物完全無概念, 當然跟她最後亦沒有開始, 其後他跟隔鄰理科班的同學L君拍拖兩個月. 多年後跟她談起她說當時很有勇氣, 可惜沒有回報. 當然不是吧, 跟我一起就真的冇運行了.....J小姐現在已有一女, 應該幸福卦.

其後中七時, 有另一位同班女同學P小姐向另一位同學說對我有意思, 但我一於詐不知, 繼續保持好友關係, 一齊食飯, 一齊放學, 就係咁多. 其後P小姐又跟L君拍拖, 幾邪! 其後她跟L君散了, L君說我破壞她們, 於是號召理科男生視我為敵, 極其幼稚. 大學時跟P讀同一個major, 但她已跟另一大學同學拍拖, 畢業後又拍了幾個, 最後兩年前嫁了坡仔, 現定居星加坡, 有兒子一個.

大學時有L小姐, 亦是中學同學, 單獨出來食飯了好幾次, 我其實只當她的朋友, 但她想多了, 可能亦以為我對她有意思, 當然最後亦是無疾而終...L小姐兩年前結婚, 有兒子一個, 超幸福.

大學三年班有另一位J小姐, 這個是最坦白的, 表白的情況是在ICQ中, 其後見面總是尷尷尬尬的, 不過亦可以理解, 食了檸檬還扮冇事真的少點EQ都不成. 自畢業後已經沒有聯絡/見面, 直至週日跟alan看完戲後看到一個疑似她的人, 輪廓有點似, 但fit了很多很多, 雖然隔著馬路, 但這兩秒的眼神交流, 應該是她吧. 在她旁邊有鬼佬, 或許是其男友吧.

最後是畢業後的K小姐, 大學同學, 是我追她,亦是我飛她, 因我選擇了alan. 其實多年來一直對她有很大的歉意, 因為傷她傷得太深了, 當時只是自私沒有好好想想怎樣結束關係就妄然做了, K小姐是一個很單純的女仔, 雖然我冇佔過佢便宜, 但心理的傷害實在很深. 其後四年前的情人節在某私房菜館竟然遇到她, 真的很邪, 我亦唯有視而不見, 但我相信她見到我跟alan在這個節日食飯的話, 可能她會頗為愕然. 至於近況真的不知道了.

最後給愛過我的女生們, 祝妳們幸福快樂!

唔落...點都唔落

最近同alan見到呢個廣告都會狂笑. 一般人見到呢個廣告可能會覺得無聊, 但對於打台牌的朋友來說, 呢個廣告好笑到震. 打台牌的朋友仔, 你俾人拉左3舖你落唔落車? "唔落...點都唔落" 哈哈...

剛剛星期五跟水小姐+肥肥打牌, 水小姐第一圈就被alan拉左3舖, 佢就學泳兒點都唔落, 咁就拉多一舖, 即係冇左2千碼, 不夠四圈已差不多輸了成個本. 最後我同alan繼上週後再度贏水小姐+肥肥, 上週贏$1100, 今週贏$1200...YES!!!!

峰壽司

昨晚看完戲又在研究那裡食飯時, alan忽然彈了一句"峰壽司?" 都好呀, 橫掂都有起碼兩年冇幫襯, 不是不喜歡, 但每每被那條人龍嚇怕, 但今次去到只見到少數人等位. 可能真係俾板前搶左好多客仔吧. 等到15分鐘就有位了. 不知灣仔板長壽司食物中毒事件會唔會令人(短暫性)重投峰壽司的懷抱?

是晚點了:
蟹柳壽司: 唔信有真蟹肉, 但都唔錯
三文魚壽司: 有蔥伴著食, 好食喎
帶子壽司: 一向都是我的至愛, 好得, 比板前好食
油甘魚王壽司: OK
火灸三文魚壽司: 都是OK
北海道三文魚: 普通, 素來都不喜歡腍身的魚
牛柳壽司: 當然不是和牛, well都係普通
鱆紅魚腩壽司: OK
醋鯖魚壽司: 我最唔鍾意的魚, alan覺得唔錯
蟹糕壽司: 跟北海道食蟹宴時的蟹糕壽司簡直是兩回事, 幸好紫菜頗脆口
火灸鰻魚壽司: 相比板前的差很遠, 既不厚肉亦不肥美
拖羅壽司(一件): $35元, alan獨食, 佢話比板前的極肥拖羅更肥美
鵝肝壽司(一件): 都是$35元, 舖了金箔扮貴野, 但係好多油+有筋...失望
另外alan食了一件$25但不知是甚麼魚的壽司, 紅色似是吞拿但佢又話唔似
蜆肉湯: 其實只是麵豉湯+蜆肉, 冇誠意.

最後埋單$350, 雖然有某些比板前出色, 但overall感覺板前比較抵食.

魔幻王國：卡斯柏王子

差點忘了曾經在戲院看過第一集, 要不是早兩個星期明珠台播了, 我的印象只有那隻獅子及女巫, 反而對四位主角完全唔記得.

其實這類片從來都不是我杯茶, 看的都是為了那些極其迫真的特技 (保守估計50年後港產片都未必做得到), 但今次看這套片卻有意外收穫: 卡斯柏王子. Ben Barnes, 26歲, 英國人. 對英國仔素有好感, 我雖然從來不喜歡長髮的男生, 但覺得這個髮型非常襯他, 靚仔到爆, 其角色會延續到第三集...good.


反之alan比較喜歡男主角Peter. 由William Moseley飾演, 今年21歲, 都是英國人...我就覺得麻麻喇.


講番套戲, 成兩個半鐘, 睇左兩三次錶, 不過總算順暢, 只是後半段女主角Susab跟王子的感情線可有可無, 不過當然可能第3集有發展都未定. 講起Susan, 有冇人可以解釋俾得聽點解Susan成日放箭, 特別是對抗敵人時, 但係背後都係得幾支箭, 用晒去邊度re-fill?

色慾都市

自問不是色慾都市的超級fans, 斷斷續續有看過電視劇, 但沒有真正的追, 對四位女主角的性格都略知. 電影版兩個多小時但一點都不悶, 整體流暢亦都合理.

如果我是Carrie: 我不會原諒Mr.Big, 雖說有甚麼結婚陰影, 如果真的不想行禮, 請一早表態, 要在數百朋友面前失婚約, 簡直是人生一大恥辱...

如果我是Samantha: 作為一個對性渴求極大的人,面對鄰居猛男的引誘, 從而想起自己應否繼續跟Smith一起, 我都會跟Smith分手, 反正自己有錢, 為何要違背自己? 都50歲了, 應及時行(性)樂.

如果我是Miranda: 我不會跟Steve離婚, 偷食不算死罪, 況且是Steve自爆, 可以原諒.

如果我是Charlotte: 我都會為好姊妹破口大駡Mr.Big, 那個咀咒雖不算很陰毒, 但出自她口卻要莫大勇氣.

有趣的是alan說他很想要carrie新居的衣帽間, 真的正到爆, 以佢買新衫的頻率, 真的要一間房給他擺衫才成.

要彈的是中文版電影海報, 大大個字寫"她們回來了", 很cheap!

可厭可惡可憎

這陣子跟老板的角力實在太累, 每天都在作戰狀態, 看她何時出手把我駡得片甲不留.

討厭她的無理, 討厭她的說話語氣, 討厭她的一切, 且看誰的容忍量較大. 坦白說我有點頂不住了...

雖然我得到越來越多同情票, 但怕且我最後都會屈服於女魔頭之下黯然離開.

還以為自己對處理女人有一手, 原來我高估了自己的能力.

百般滋味在膝頭

由兩點開始上床睡覺已經下著大雨, 雨水滴著冷氣機頂超嘈, 幸而小弟素來不受這些聲音影響入眠, alan便沒有我這過人之處. 早上八點去洗手間, 這時超大雨, 不停閃電+行雷. 到客廳一看, 果然牆邊有漏水 - 每逢大雨, alan家客廳窗下的牆邊必會滲水. 記得3年前剛搬來的時候某天深夜下大雨, 滲水得半個客廳都有積水, 今次的情況卻沒有那次的嚴重, 但看到牆邊不斷有水標出的確有點心寒. 開了電視, 果然黑雨!! 放了地拖在積水的地方便繼續訓.

每個週末都會跟家母飲茶, 雖然黑雨, 但家母說無所謂, 果然風雨不改, 定了去灣仔的車氏. 11點鐘出門口, 升降機壞了, 於是走下一層搭另一架, 又壞!! 已心感不妙, 但唯有從10樓行樓梯到樓下, 看到大廈出口...水浸!! 所以升降機因水浸壞了. 穿了波鞋的我, 如果唔理照行一定濕透還要忍受幾個小時, no way! 但如果要返上樓換鞋便要行10層樓梯, no way! 但最後都唯有忍著膝痛來回10層樓梯, 近乎拿了我的狗命...

因alan家在上環海味街, 屬低窪地帶, 所以每下大雨, 這條街必會水浸, 澗水行期間還要見到死大蟑螂在水上漂浮, 十萬個嘔心. 沿路看到陸上交通癱瘓所以搭地鐵. 好不容易去到灣仔車氏樓下, 大廈職員整幢大廈因大雨停電, 所以車氏還未做生意...頂! 最後只好行十分鐘去瑞安鴻星.

飲了茶回來兩點多, 附近位置已經退了水, 百佳惠康仍然關門, 海味店還在收拾殘局, 大廈升降機才開始維修...又要行10層樓梯, 見到有長者同我行樓梯, 真替他們辛苦. 我們住10樓還勉強頂得住, 如果我住22樓, 真係打死都唔落街. 待會還要出外健身, 想起那10層樓梯真的有點猶豫, 忽然要住一日唐10樓...

真的百般滋味在膝頭!!

健身奇緣三

加記被喻為member魚塘素來都是公開的秘密, 基本上這個情況無論是member與否應該見怪不怪, 不過我上星期見到的情形真的要講講:

事發在上星期六的灣仔加記, 時間已是晚上10點左右. 跑完8公里換衫嘆下蒸氣浴, 此時見到一位member (冇身型+樣子唔掂), 其實之前見過很多次. 當時蒸氣房只有我倆, 我已經避忌沒有望他, 但都隱約見到他一如以往隔著毛巾把玩重要部位, 跟住我即走去隔鄰的sauna房, 以免令他誤會我有興趣跟他一起玩...不夠一分鐘他又過來, 看到他那個令人嘔心的眼神, 我唯有...沖涼走.

沖完涼後經過蒸氣房門口看到有位疑似直仔向職員投訴有位人兄在房內不斷攪自己. 於是職員便探頭向那位member質問, 這位member當然例牌否認, 說自己只是站著手沒有幹著什麼的狡辯. 當然因沒有第三者指證, 職員亦冇位入佢, 所以唯有口頭警告了事.

其實我覺得這位member精神有問題, 要玩的都應該小心點及聰明點, 希望這位member就廉恥的原因, 絕跡於灣仔加記...咪阻住晒.

藝員的代價

雀友業sir當了十多年DJ, 然後做了幾年freelance幕後配音工作. 今年簽了電視台做主持, 由於不是包薪藝員, 所以每次做節目就計一次騷錢, 就好像上門補習一樣, 逐次計錢. 業sir依家每個星期做兩次節目左右, 即係每個月得八次騷錢, 佢都慨嘆雖然入息是比以前穩定, 但只夠供樓, 早幾次唱片市道還好, 唱片廣告配音每月總有一兩次, 現在唱片業有如死城, 配音工作便大大減少. 況且業sir既不是包薪又沒有簽經理人, 所以有咩job都唔會輪到佢.

最好笑的是佢話樂小姐睇過佢既節目, 想佢可以執下個樣, 整下棚牙. 樂小姐叫到唔可以唔做, 整一整容就使左幾萬蚊, 當然電視台唔會俾番錢佢啦…我諗呢樣就係”未見官先打五十大板”.

所以做藝人好多時都係表面風光, 其實真係要付出很多代價.