中式私房宴

早陣子alan老板極力推介一處吃中式私房菜的地方, 據聞一晚只做兩圍, 亦因此預訂都要兩個月以上. 自己朋友唔夠數, 所以加埋alan的下屬一齊食.

地點原來極近我同alan的住址,在一棟舊式大廈, 但門面裝修尚算不錯.

正式上菜前有蝦片食, 相信不是自家製造, 當食明輝蝦片(其實依家仲有冇明輝蝦片?)

第一道: 蜜味鴨胸配沙律
皮脆多汁, 係我暫時食過最得的鴨胸, 質感剛剛好, 沙律亦好新鮮, 好夾.


第二道: 炒素翅
以前未食過素翅, 感覺都似翅既, 加埋蛋一齊快炒, 都幾好食.

第三道: 蠔豉崧配生菜包
古老菜之一, 鳳城亦有類似的菜式, 非常香口, 一流.


第四道: 蝦子柚皮
另一古老菜, 因柚皮太蝦人做所以好多都唔願再做. 某些酒樓亦有當點心做, 但大多普通至爛食. 肥肥似乎評價麻麻, 但我覺得好味.

第五道: 油浸銀雪魚
炸熟後再好像用蒸魚的方法淋上, 坦白說我只覺得普通, 我寧願日式的做法- 點沙律醬.

第六道: 煙燻雞
第一啖食, 嘩好煙...我就麻麻地

第七道: 花膠冬菇湯
我對中湯麻麻, 但都飲晒


第八道: 花雕蒸蟹配米粉
蟹一向都是"賣飛佛", 雖然食既過程異常複雜麻煩, 但我都超勁鍾意, 每次食蟹我都好忙, 因為除左幫自己剝殼外, 仲要幫埋alan剝...講番呢個蒸蟹, 好味, 可惜已飽了大半.


第九道: 炒飯
alan忙了影相, 我記得食了少少, ok好味囉, 但已經唔記得有咩料

第十道: 陳皮蓮子茶
我最唔鍾意的甜品, 聞到陣藥味已想倒胃..所以一啖都冇飲過.

食完廚師娥姐出來派片及循例收集意見 (或者想聽下客人的讚美).

總括來說, 喜歡食中菜的人一定好鍾意, 但係六千蚊一圍抵唔抵就見人見智了.

金門莊
上環德輔道西二十五號德輔大廈四字樓零一室
電話:25432202